Háskóla-

grunnur HR

Hvað er háskólagrunnur HR?

Háskólagrunnur HR er góður undirbúningur fyrir fólk sem stefnir í háskóla og þá einkum í HR en hefur ekki lokið stúdentsprófi.

Hverjir geta sótt um?

Þeir sem hafa lokið skilgreindu starfsnámi úr iðngrein, þeir sem hafa lokið Menntastoðum hjá símenntunarstöðvum og þeir sem hafa stundað nám í framhaldsskóla en ekki lokið námi. Einnig geta þeir sótt um sem hafa stúdentspróf og þurfa að bæta við sig stærðfræði og raungreinum.

Hvað ef íslenska er ekki mitt fyrsta tungumál?

Öll kennsla er á íslensku og erfitt er að stunda námið nema að viðkomandi hafi gott vald á íslensku.

Hvaða greinar kem ég til með að læra?

Allir nemendur taka íslensku, ensku og stærðfræði og dönsku. Nemendur taka svo mismunandi greinar eftir því í hvaða háskólagrunni þeir eru í.

Hvar finn ég sýnishorn af stundatöflum?

Sýnishorn af stundatöflum er hægt að sjá á hér á vefnum undir deildarsíðu Háskólagrunni HR. Þær stundatöflur sem eru á ytri vefnum eru einungis sýnishorn og birtar með fyrirvara um breytingar.

Hvar finn ég bókalista?

Nemendur geta séð bókalista á ytri vef skólans undir deildarsíðu Háskólagrunns HR. Einnig geta nemendur séð bókalista í kennslukerfi skólans undir hverri námsgrein fyrir sig (lesefni).

Hvernig er námsmatið í deildinni?

Námsmat í deildinni er fjölbreytt. Bæði eru lokapróf í ýmsum áföngum og símat í öðrum áföngum.

Er bekkjarkerfi?

Já, í Háskólagrunni HR er bekkjarkerfi. Nemandi er í sama bekknum frá því hann byrjar og þangað til námi lýkur að vori. Skipulag námsins er á þann hátt að nemendur eru stundum í samkennslu með öðrum bekkjum. Reynt er að koma því þannig fyrir að þeir nemendur sem hafa valið sama háskólagrunninn eru saman í bekk, t.d. eru þeir sem eru í tækni- og verkfræðigrunni saman í bekk o.s.frv.

Hvenær eru prófin?

Á vef HR er hægt að skoða almanak fyrir hverja önn fyrir sig fram í tímann. Á almanaki kemur fram hvenær prófatímabil frumgreinadeildar er. Lokapróf í frumgreinadeild eru venjulega í desember og í maí.

Get ég skipt um háskólagrunn á miðri leið?

Nei það er ekki hægt.

Þarf ég að hafa tölvu?

Já það þarf tölvu í náminu. Allir nemendur taka áfanga í Excel og einnig er talsvert um tölvuvinnu í hinum ýmsu greinum.

Hvað er námið í háskólagrunni langt?

Námið í Háskólagrunni getur tekið mislangan tíma. Hægt er að velja um að taka námið á einu ári sem hefst í ágúst eða á þremur önnum en það hefst í janúar.

Er hægt að taka námið í fjarnámi?

Það er ekki boðið upp á fjarnám. Námið er blanda að hefðbundnu og starfrænu námi. 

Ef ég stefni í tækni- eða verkfræði, hvaða háskólagrunn á ég að velja?

Þú velur tækni- og verkfræðigrunn.

Ég er með stúdentspróf af félagsfræðibraut en langar í verkfræði, get ég bætt við mig í frumgreinadeild?

Já, þú getur bætt við þig greinum í stærðfræði, eðlisfræði og efnafræði allt eftir því hvað þig vantar með hliðsjón af því námi sem þú stefnir í. Einnig býðst þér að taka aðrar greinar eins og Excel og forritun svo eitthvað sé nefnt. Kostnaður er sá sami óháð því hversu margar námsgreinar þú tekur.

Ég er iðnlærð/ur. Kemst ég í nám hjá ykkur ?

Já, allir sem hafa lokið burtfararprófi eða sveinsprófi úr iðngrein eiga greiðan aðgang í námið og eru alltaf teknir inn.

Hver eru inntökuskilyrði í deildina?

Inntökuskilyrðin í deildina eru bókleg og gerð er krafa um starfsreynslu. Umsækjandi verður að geta sýnt fram á að hafa verið í minnst tvö ár samfellt á vinnumarkaði eftir 18 ára aldur en þó er ekki nauðsynlegt að hafa verið á sama stað.

Ég lauk Menntastoðum hjá Mími, kemst ég í Háskólagrunn HR?

Þeir sem ljúka Menntastoðum hjá símenntunarstöðvum, þar á meðal frá Mími, uppfylla bókleg inntökuskilyrði. Jafnframt þarf að uppfylla skilyrði um starfsreynslu.

Get ég fengið fyrra nám metið inn í nám í háskólagrunni?

Hægt er að sækja um að fá áfanga metna þegar námið er hafið. Hægt er að sækja um mat á fyrra námi sem námsmatsnefnd úrskurðar. Vekjum athygli á að metnir áfangar eru ekki lánshæfir hjá Menntasjóði námsmanna.

Hversu mikla starfsreynslu þarf ég til að uppfylla inntökuskilyrði?

Lágmark 2 ár (24 mánuðir) en þó ekki samfellt á sama stað. Iðnlærðir þurfa ekki að skila inn vottorði um starfsreynslu þar sem fyrra nám telst uppfylla skilyrðin.

Get ég stundað vinnu með náminu?

Við ráðleggjum nemendum okkar alltaf að vinna sem minnst með fullu námi. Námið er krefjandi og það er mjög erfitt að ætla sér að vinna mikið með því. Í þriggja anna námi gefst tækifæri á að vinna með náminu.

Er tekið inn um áramót?

Já, það er tekið inn í þriggja anna nám um áramót. Einnig er tekið inn í viðbótarnám við stúdentspróf ef viðkomandi getur nýtt sér áfanga vorannar. En í viðbótarnámi er alltaf tekið mið af fyrra námi.

Get ég farið með lokapróf úr Háskólagrunni í aðra háskóla en HR?

Nemendur hafa farið í aðra háskóla að loknu námi en við lofum því ekki að nemendur komist inn í alla háskóla. Við hvetjum alltaf nemendur okkar til að kynna sér vel inntökuskilyrði þess náms sem þeir stefna í.

Get ég fengið metið nám úr skólum erlendis inn í ykkar nám?

Hægt er að fá metið ef námið í Háskólagrunni HR er sambærilegt. Til er stofnun á Íslandi sem metur nám frá erlendum skólum sem heitir Enic/Naric og við beinum fólki oft þangað til að fá úr því skorið hvað námið í útlöndum er sambærilegt við hér á Íslandi.

Hvenær hefst kennsla á daginn og hvenær lýkur kennslu á daginn?

Kennsla hefst 8:30 og lýkur á misjöfnum tímum.

Hver er meðalaldur í háskólagrunni?

Meðaldur er misjafn á milli ára en getur verið á bilinu 25 - 28 ár.

Er boðið upp á einhverja aðstoð við námið?

Nei ekki sérstaklega. Nemendur eru sjálfir duglegir við að mynda hópa og hjálpast að við námið. Stundum er boðið upp á aðstoð fyrir próf sem kennari stýrir. Mjög öflug þjónusta námsráðgjafa er við skólann þar sem nemendur geta fengið aðstoð við m.a. að skipuleggja nám sitt.

Hvað kostar námið?

Sjá undir skólagjöld HR

Er hægt að fá námslán hjá Menntasjóði námsmanna?

Eins árs námið er lánshæft hjá Menntasjóði námsmanna en þriggja anna námið er ekki lánshæft. Nemendur í þriggja anna námi geta þó fengið námslán fyrir skólagjöldunum.

Hvernig sæki ég um?

Sótt er um á vef HR í umsóknarkerfi. Fylla þarf út persónuupplýsingar og skila inn ákveðnum fylgigögnum. Kynntu þér vel á vef háskólans hvaða grunn þú átt að sækja um áður en þú ferð inn á umsóknarvefinn.

Hvaða fylgigögn þurfa að vera með umsókn?

Umsækjandi þarf að skila inn staðfestu afriti einkunna úr framhaldsskóla. Einnig þarf umsækjandi að skila inn starfsvottorði þar sem það á við frá vinnuveitenda. Iðnlærðir þurfa eingöngu að skila inn burtfarar/sveinsprófsskírteini. Með umsóknum í viðbótarnám við stúdentspróf þarf eingöngu að skila inn stúdentsprófsskírteini. Fylgigögnum skal skila rafrænt og hengja við umsókn.

Hér er hægt að sjá sýnishorn af starfsvottorði.

Þið biðjið um starfsvottorð, hvað er það?

Þar sem inntökuskilyrði eru einnig verkleg þarf að fá starfsvottorð frá vinnuveitenda. Umsækjandi þarf að geta sýnt fram á að hafa verið á vinnumarkaði í minnst tvö ár frá 18 ára aldri. Á starfsvottorði þarf að koma fram hvaða starfi viðkomandi gegndi, hversu lengi og í hve miklu stafshlutfalli.

Get ég farið með þetta nám/lokapróf í skóla erlendis?

Nemendur hafa farið erlendis að loknu námi í Háskólagrunni HR. Samt sem áður getum við aldrei lofað því að hægt sé að komast inn í alla heimsins háskóla en við hvetjum alltaf fólk til að kynna sér vel þau inntökuskilyrði sem viðkomandi skóli setur. Nám í Háskólagrunni HR tekur mið af því að nemendur haldi áfram í HR.

Get ég hitt námsráðgjafa?

Já, það er ávallt mjög gott aðgengi að náms- og starfsráðgjöfum. Nemendur panta tíma í gegnum kerfið Karaconnect. Lesa meira á síðu náms- og starfsráðgjafar.

Hvað er ég í mörgum áföngum á hverri önn?

Náminu er skipt upp í lotur og það er misjafnt eftir lotum hve margir áfangarnir eru.

Uppfylli ég inntökuskilyrðin í háskóladeildir HR ef ég hef lokið háskólagrunni HR?

Já, Háskólagrunnur HR byggir á aðgangsviðmiðum HR og með því að velja ákveðinn grunn uppfyllir þú inntökuskilyrðin inn í það háskólanám. 

Get ég tekið námið á lengri tíma en einu ári?

Tvær námsleiðir eru í boði: að taka námið á einu ári eða taka námið á þremur önnum. Einnig er möguleiki á að skipta einu ári í tvö ár. Best er að hafa samband við skrifstofu Háskólagrunns HR um að skipuleggja námsframvindu þannig að það henti viðkomandi.

Hvar finn ég upplýsingar um framvindureglur?

Hér finnurðu upplýsingar um framvindureglur Háskólagrunns HR.

Hvar fæ ég vottorð eins og staðfestingu á námi og fleiri vottorð?

Námsferil frá framhaldsskóla er hægt að fá í viðkomandi skóla og starfsvottorð hjá vinnuveitenda. Nemandi sem er við nám í skólanum getur farið inn í Portal í Canvas og nálgast vottorð þar.