Háskóla-

grunnur HR

Anna S. Bragadóttir tók við starfi forstöðumanns Háskólagrunns HR í byrjun haustannar 2020. Háskólagrunnur HR er undirbúningsnám fyrir háskólanám, ásamt viðbótarnámi við stúdentspróf.

Anna starfaði lengi við deildina sem íslenskukennari áður en hún tók við starfi forstöðumanns. Eðli starfsins samkvæmt er hún hætt að kenna en sinnir þess í stað öðrum spennandi verkefnum. „Nei, ég er ekki að kenna en kem heilmikið að kennslunni. Það er alltaf framþróun í kennslu sem gerir þetta svo spennandi starf. Það er alltaf verið að prófa eitthvað nýtt,“ segir hún. 

Síðastliðin ár hafi verið gert stórátak í stafrænni kennslu eins og á mörgum stöðum. Það sé jákvæð þróun og allir hafi lært heilmikið á því.

Stærðfræðin engin grýla

Hún segir deildina ekki vilja einskorða kennsluna við veggi háskólans. „Þetta er svo fjölbreyttur hópur nemenda hjá okkur sem kemur víða að. Þau hafa öll mismunandi lífsreynslu að baki. Svo sér maður marga taka framförum hér og hreint út sagt blómstra. Ýmsir standa sig oft mun betur en þeir bjuggust við í byrjun. Til dæmis hefur stærðfræðin stundum verið grýla í hugum sumra en svo sér maður að einhver gluggi opnast.“ Þar sem Háskólagrunnur tekur eitt ár sem er „vel þjappað“ eins og Anna orðar það „segja mörg að þau læri vel öguð vinnubrögð.“

Deildin var komin af stað með svokallað blandað nám áður en heimsfaraldurinn brast á, þar sem nemendur gátu valið að ljúka Háskólagrunni á þremur önnum í stað eins árs, og nýtt sér tæknina meira í stað þess að mæta á hverjum degi. „Þetta námsfyrirkomulag er frábær viðbót við eins árs námið í Háskólagrunni og við tökum nemendur þá inn um áramót.“

Fréttir ef það var stelpa í bekknum

Námið var stofnað hér á landi árið 1964 að danskri fyrirmynd og þá við Tækniskóla Íslands, síðar Tækniháskóla Íslands, sem sameinaðist Háskólanum í Reykjavík árið 2005. Á þessum áratugum hefur nemendahópurinn víkkað út svo um munar. Áður settust á skólabekkinn í frumgreinadeild iðnaðarmenn sem stefndu á nám í tæknifræði eða verkfræði þegar kennsla hennar hófst á Íslandi. „Það voru fréttir ef það var stelpa í bekknum! Sem betur fer er meiri breidd í þessu nú og nemendurnir læra mikið hver af öðrum.“ 

Í dag geta nemendur valið tækni-, tölvunarfræði-, laga-, eða viðskiptagrunn eftir því hvaða háskólanám heillar þá að undirbúningsnáminu loknu. Svo er jafnframt í boði að ljúka viðbótarprófi við stúdentspróf fyrir nemendur sem vantar frekari einingar í raungreinum til að hefja draumanámið.

Hringdu í 140 nemendur 

Anna segist stundum sakna þess að kenna eftir að hún tók við starfi forstöðumanns. „Mér finnst gefandi að vera í samskiptum við nemendurna. Við tókum okkur til, ég og Gunnhildur verkefnastjóri á skrifstofunni, og hringdum í alla 140 nemendur deildarinnar! Skiptum einfaldlega listanum á milli okkar og freistuðum þess að ná í alla. Það var alveg yndislegt að heyra í þeim og eiga þetta samtal á þessum Covid-tímum þegar svo fáir voru í háskólabyggingunni.“ Nemendur voru glaðir að heyra í þeim að sögn Önnu. „Já, það er bara svo gott að spjalla stundum. Annars var okkar fólk bara bratt, saknaði þess mest að hitta ekki bekkinn sinn í eigin persónu en þeim gekk annars vel og fannst HR hafa staðið sig vel í kófinu. Það var mjög gott að heyra.“

Slökum ekki á neinum kröfum

Anna segist ekki sjá stórar breytingar framundan á starfi deildarinnar fyrir utan áform um öflugri stafrænar kennsluaðferðir. „Við erum með öflugt og gott nám og ég vil viðhalda því góða starfi sem hefur farið fram og mun sjá til þess að ekki verði slakað á neinum kröfum. Það er góð aðsókn í námið og núna síðast gátum við ekki tekið alla inn. Ég hvet alla til að lesa sér til á vefnum okkar hr.is og huga að umsókn með ágætum fyrirvara.“