Samfélagssvið

Á samfélagssviði er boðið upp á námsleiðir í lögfræði, viðskiptafræði, hagfræði, sálfræði og íþróttafræði, í fjórum deildum. Nám og kennsla miðar að því að veita nemendum traustan fræðilegan grunn á sínu fagsviði og hagnýta færni sem gefur bestan mögulegan undirbúning fyrir störf og frekara nám.

Áhersla er lögð á fjölbreyttar kennslu- og námsmatsaðferðir, raunhæf verkefni, virka þátttöku nemenda og tengsl námsins við atvinnulíf og samfélag. Kennt er á BSc-, meistara- og doktorsstigi. Flest námskeið í meistaranámi eru kennd á ensku. Á samfélagssviði er öflugt vísindafólk sem stundarrannsóknir í virku alþjóðlegu samstarfi. Nemendur á öllum námsstigum fá tækifæri til að vinna að rannsóknarverkefnum í samstarfi við vísindafólk skólans á fjölbreyttum fræðasviðum.

Á meðal fræðasviða á samfélagssviði eru viðskipti, fjármál, hagfræði, stjórnun, nýsköpun og frumkvöðlastarf, heilsusálfræði, þroskasálfræði, klínísk sálfræði, taugasálfræði, íslensk lögfræði og alþjóðalög, frammistöðumælingar og greining í íþróttum, og sálfræðilegir og félagsfræðilegir þættir íþrótta. Á sviðinu er unnið að fjölmörgum þverfaglegum rannsóknarverknum þar sem tekist er á við flóknar samfélagslegar áskoranir, s.s. áhrif heimsfaraldurs og tækniframfara á líðan íslenskra ungmenna, áskoranir í upplýsingaöryggi á tímum notkunar gervigreindar í heilbrigðisgeiranum, áhrif samspils vinnu og einkalífs á jafnrétti, sjálfbærni orkumarkaða í Evrópu og notkun tækninýjunga til að minnka flöskuhálsa og auka aðgengi að heilbrigðisþjónustu.

Deildir innan samfélagssviðs